lai-phunpi-ni

Lai Phunpi Ni Tuanbia

Tue, 08 Mar 2011 04:12:07 +0100

                          Kawlram hi Mirang sin in luatnak pek a si lai tiin Aung San le Attlee cu 1947 January thla 27thni ah lehhmah an rak thut. Cun Kawlram ah Parliament thimnak a chuah hlan chung Members Of Constituent Assembly( 250 members ) ser a si lai icu nih cun ram cu a hruai lai ti a si. Laimi zong hi Kawlmi he hmuhkhat ah luatnak kan lak ve tikah Cu Constituent Assembly ah minung 6,pengkhat in minung pakhat cio thim in thlah an si hna i cucu Chin/Lai Affiars Council ( Lai Cozah ) tiah auh an si. Cu hna cu Vuanci ah Vuantu Maung ( Kanpalet ), Secreatary ah Capt. Mang Tung Nung (Tidim ), Chairman ah Lian Thum ( Halkha ), chungtel ahHlur Hmung ( Falam ), That Hlaing ( Paletwua ), Sang Ning ( Matupi) an si hna. 1950 kum October ni 9 ni tuahmi Chin/Lai Affiars Council meeting ah Lai Vuanci Vuantu Maung nih ( Laimi hi miphun dang bantuk in, National Day timi hi kan ngeih ve a herh ) tiin biatung a dirh. Cu Biatung cu Pu Sang Ning, Capt. Mang Tung Nung hna nih an dirkamh. Council member dihlak nih an hna a tlak hnu ah atanglei ni,nithum lak ah aa tlak bik le atha bikmi Ni kha thim awk in, an iceih. Cu Ni hna cu, No.1. Lairam in Ramukbawi hna, Frontier Areas Committee of Enquiry nih Maymyo ah an auh hna i biahalnak an tuah ni (April 19, 1947), No.2. Lai mipi nih Falam ah Democracy uknak phung kan ithim Ni ( February 20th 1948 ) No 3…. Chin/Lai Special Division Act an feh terni ( October 12th,1948 ) an si. Council upa hna nih Laimi kan tuanbia kha kap tampi in an ceihhmai hnu ah, February 20th1948 ni a tha bik tiin bia an fun.A si nain Pu Sang Ning nih ( Februaty hi Matupi lei ah lo tuancan a si caah December thla a si loah Januarythla ah a tha deuh hnga maw ) tiah bia a vun chuah pi tikah Capt. Mang Tung Nung nih Lai Phunpi Ni (Chin National Day) timi cu mipi he, puai bantukin tuah awk ah tinhmi a si lo i a ulh in ulh awk ( Observe )a si ning a fian ter hnu ah Pu Sang Ning zong a hna a tla than ve i Chairman Pu Lian Thum nih ( 1948 February 20th 11:00 Am cu Lai Phunpi Ni ( Chin National Day ) a si tiah a thanh. 1948 February 20thni Falam khua i Laimi minung 5000 nih pumhnak meeting an tuahmi hi Lai Phunpi Ni (Chin National Day) si teseh ti duhnak he tuahmi a rak si lo. Hi Meeting hi Chin/Lai Special Division pumpi komh meeting a si i nili chung ( February 19th, 20th, 21st, le 22nd )Meeting tuah a si.
                                           Nikhatnak ( 19th February ni ) ah Lairam caah Health, Education Transpot tibantuk kong ceihhmai chimrelnak a si i nihnihnak ( 20th February ni ) ah Lairam ah zeibantuk uknak phung dah kan hman lai timi kong ceihhmai a si. Mipi nih zapi nih uktu thimnak phung, Democracy phung kan hman lai tiin bia an khiah. Cu bantuk in zapi thimnak Democracy phung an ithimnak cu lakhruak in a chuakmi biakhiahnak a si lo. Tuanbia saupi a ngeimi a si. Tahchunnak ah,Mirang nih Chinram uknak caah “ The Chin/Lai Hills Regulation Act timi hi, August 29th,1896 ni ah a rak ser ko nain, pengkhat le pengkhat Ukning phung a dangdang cio in a rak hman. Tahchunnak ah Kanpalet peng ah Chawng-Uk timi Mirang nih aduh mi poh kha uktu ah a chiah hna, Matupi peng cheukhat hmun ah mirum poh kha uktu bawi ah chiah a si. Chaklei Lairam ah Ramukbawi, Roco uknak phung hman a si fon. Cu bantuk cun akhat lomi phung in Mirang nih Lairam kha kum 50 reng lo a rak uk. Cu long siloin Mirang nih a sermi phung, Ramukbawi hna kha mipi nih kumkhat nikhat, a cheu hmun ah nihnih, a lak in raintuan piak, Cozah riantuan hna a lak in kuli phorh piak, a lak in thing awn piak, Ramukbawi hna kha, Mipi nih, kumkhat lorawl pungkhat cio pek, Sakah tik zong ah Saliang, Savang tibantuk Ramuk bawi pek, tibantuk uknak phung kha mipi nih an duh lo caah Lairam hmun kip ah hnahnawhnak a chuak (Tahchunnak ah Thantlangpeng, Farrawn meeting ( Minung 30, 1947 September), Hriangkhan Meeting ( khua 60,minung 300 ), Halkha Thawnginn ( minung 600 buaibainak), Falam District Council (September 1947, Minung 200 ), Tedim peng ah Zo, Thado hna nih Kamhaubawi sin in luat awk ah 1946-47 hrawng buaibainak, Falam peng cheukhat, Lusei lei an zamnak, Kanpalet lei ah Chin/Lai Hills Union Organization buaibainak )tibantuk in hmunkip pengkip ah a kumkum in hnahnawhnak tampi a rak um cang. Cu long siloin Frontier Areas Committee of Enguiry nih Lairam ukbawi pawl Maymyo ah ( 19th-20th, April, 1947 ) a ton lio hna zong ah uknak phung a khat lomi an hman caah hlathlai a herh tiin remark an tial, tibantuk a ruang tampi a um. Tedim peng zong ah hnahmawhnak a tam tuk caah Tedim Ramukbawi hna cu an kong lam chim awkah Rangoon ah an kal. January 19th,1948 ni ah, Excutive Committee aiawh in, Foreign Minister, Finance Minister, Home Minister le Chin/Lai Minister hna nih Tedim in a ra mi Ramukbawi hna cu hmunkhat ah an ton hna.
                                    Cu bantuk in hnahnawhnak hi Lairam pumpaluk ah a um caah cu Committee nih, Inguiry Committee tuah in Lairam ah hlathlai a herh hrim tiin bia an fun. Cu biafun mi cu Lai Vuanci Vuantu Maung nih January 28th,1948 ni tuahmi Kawlram Vuanci meeting ah a chuah pi. Vuanci meeting ah hnatlaknak an tuah hnu ah Hlathlaitu Commission pakhat kha 1948 Febuary 4th ni ah ser a si. Cu Commission ah Hotu ah Lai Vuanci Vuantu Maung, Secretary ah U Thein Maung( Commissioner Frontier Areas Administration ), le U Soe Win( Retired Education Officer ) an si. Hi Commission hi 12th February, 1948 ah Tedim, 17th February,1948 ah Falam, Cun Halkha, Syzin , Kanpelat tibantuk in a pengpeng in ni dangdang ah phu 10 in an ton hna. Cu hnu ah Chin/Lai Special Division Tlangkulh Meeting cu, 19th February in 22th February tiang nili chung, Falam khua ah tuah a si. Hi Falam khua meeting ah hin cun Kawlram President Soa Shwe Thaike zong Observer in a rak itel ve. 19th Februaryni ah Lairam caah Education, Health, tibantuk chimrelnak an tuah. Nihnihnak, 20th February 1948 ni ah, Laimi nih zeibantuk uknak phung dah kan hman lai ti mi bia ceih a si i Mipi thimnak phung, Democracy phung, kan duh tiin biakhiahnak an tuah. Cu zawn te cu Laimi nih kanmah kan kong kanmah tein khuakhan lairelnak nawl ( Self Derermination Power ) kan ngeihnak a langhnak a si. Cu long siloin hlathlaitu Commission nih Lairam chung Vuanthawk pohpoh kha 26th February 1948 ni ah Meeting an auh hna i pengkip in Lai mipi an lungput le thil umtuning zong an hlathlai rih.
                                               Cu hnu ah Commission nih ( Laimi nih Democracy phung an ihamnak,Ramukbawi le Chawnguk pawl kha compensation pek awk an lung a Laimi nih, Democracy phung kan ithim ni, Feb. 20th 1948 ni cu Chin/Lai Affiars Council nih, 1950 kum October 9th ni ah Lai Phunpi Ni - Lai National Day ( Chin National Day ) tiin biakhiahnak an tuah hnu ah Laimi nih CND timi hi kan ngei ve. A hmaisabik Lai Phunpi Ni ( Chin Natioal Day) cu 1951 kum ah Mindat khua ah tuah a si. Cu puai ah Kawlram Prime Minister U Nu, Karen Vuanci Mahn Ba Saing, Pithezi le Tatanazi Vuanci Zung Secretary Thakhin Thar Khin, Tit-taw Vuanci zung in Situ U Hman, Shan State Secretary U Aung Baw, hna nih an mipum in an rak tel pi hna. Kawlram President, Shan Vuanci, Kachin Vuanci, Kayah Vuanci hna sin in upat peknak cakuat zong rel a si. Cu bantuk cun avuikhat nak Chin Natioal Day cu Kawlram chung ummi miphunkip hna le, nawlngeihnak a sang bikmi hna nih an raktheihhngalh A vuihnihnak Kawlram Parliament thimnak cu 1956 ah tuah a si. Lairam ah Phahsahbalah Party nih Parliamen Thutdan 14 chung ah 12 an hmuh caah Phahsahbalah cu Chin Cozah an cang. Hotu Pu Za Hre Lian cu avuihnihnak Lai Vuanci a hmu than. Phahsahbalah Lai Cozah nih, a vuikhatnak Lai Parliament pumhnak cu 1956 July thla ah an tuah. Cu pumhnak ah Phahsahbalah MP Pu Thang Lian nih, Lai Phunpi Ni ( Chin National Day ) hrawh awk in biatung a dirh i Phahsahbalah MP Pu Sang Ning nih a dirkamh. Phahsahbalah Party a si lomi MP Pu Ro Thang le MP Pu Hrang Nawl nih fak piin an el nain Me an thlak tikah me 12 le me 2 in an sungh caah, cu ni ah cun Lai Phunpi Ni ( Chin Natial Day ) cu Phahsahbalah Lai Cozah nih an thih ter. Cu kum 1956 December thla ni 4 ni ah Vuanci Pu Za Hre Lian le Phahsahbalah Party nih Halkha khua ah Pangpar Puai tiin Lairam ah a um bal lomi puai an tuah. Cu cawlcanghnak cu adik lo ti langhter nak ah, CNO Party a si mi Pu Vuantu Maung, Capt. Mang Tung Nung le Pu Hrang Nawl hna nih, 1957 February 20th ni ah Tidim khua ah anmah CNO party long in Lai Phunpi Ni (Chin National Day) cu an tuah ve.


                                1958 January 23th ni ah Pu Hrang Nawl cu MP sinak in phuah a rak si. Cu caah Chin/Lai Parliament ah MP 13 long an tang. 1958 kum ah,Kawlram Phahsahbalah Party phuhnih ah a then tikah Lairam zong ah phuhnih ah an ithen ve. An pahnih in MP 6 veve long an si tikah Lai Cozah an tling ti lo. Cu caah Independence MP Pu Ro Thang kha an phuhnih in an sawm veve. Athiang Phahasabalah nih Lai Vuanci in bia an kam. Ti-me Phahsabalah nih Pu Thang Lian hi Vuanci kianh awk in an rak nawl. Pu Ro Thangnih fak piin a tuaktan hnu ah, Pu Thang Lian nih Lai Phunpi Ni (Chin National Day) hi ka nun ter than lai tiah lehhmah a thut ah cun Lai Vuanci cu ka kianh lai i nanmah Ti-me Phahsahbalah me kan pek hna lai, tiah a ti hna. An hna a tlak caah MP 5 hmai ah Pu Thang Lian nih lehhmah a thut. Pu Thang Lian bia aa kamnak le lehhmah a thutnak cuKawlram pumpi theih in 1958 Novenber 12th ni, The Nation Tadinca ah an chuah. Cu ticun Ti-me Phahsahbalah cu Lai Cozah ah an chuak. Ti-me Phahsahbalah Lai Cozah nih cun Parliament pumhnak an vun tuah i Vuanci Thang Lian nih MP Shien Thang kha , Pangpar puai thih ter in Lai Phunpi Ni (Chin National Day) nun ter than awk ah biatung a dirh ter. Me tam deuh hna tlak a si caah Lai Phunpi Ni ( Chin National Day ) hi a nung than cang tiah Secretary Ro Thang nih a thanh.
                                          Kumthum chung a thi cia mi Lai Phunpi Ni (Chin National Day) cu 1959 February 20th ni ah Chin/Lai Parliament min in Rangoon Windamare ah an tuah than. Halkha khua in Fang zupi 10, peng le To he, Lai laam lam tu ding ah ngaknu 11 le tlangval 11 an cah hna. Cu puai ah President Saw Swe Thaike le ramdang Ambassador cheukhat nih an lawmh pi ve hna. Cun Vuanci Thang Lian nih Cabinet ah a chuah pi i Cabinet nih an hna atlak hnu ah Kawlram Parliament pi pumhnak ah Burma Gazetted Holiday si awk in bia an rak khiah. Parliament biakhiahnak hi President nih lehhmah a thut hnu long ah Upadi ah a cang. A si nain zeiruang ah dah Lai Phunpi Ni ( Chin National Day) hi Upadi tiang a phak lo tihi nihin ni tiang theihnak a um kho rih lo. Ruah awklen a ummi cu, 1958 October 31stni in 1960 April 4th ni tiang General Ni Vun kha Kawlram Vuancichuk a rak si tikah hi he hin pehtlaihnak a um hnga maw tiin ruah len awk in a um. A vuithumnak Kawlram Parliament thimnak cu 1960 February thla ah tuah a si. Lairam ah Parliament Thutdan 14 chung ah A thiang Phahsabalah nih thutdan 5, Ti-me Phahsabalah nih thutdan 5 veve an si than rih i Cozah an tling kho lo. Cu caah CNO kha Athiang Phahasahbalah nih an sawm hna i CNO thutdan 3 he, A thiang phahsahbalah nih, Thutdan 8 an ngeih caah Lai Cozah an cang Pu Za Hre Lian cu Lai Vuanci a hmu than iSecretary, Chairman le Vice Chairman vialte cu CNO nih an tleih dih. CNO bawmhnak in Pu Za Hre Lian cu Vuanci a hmuh than caah CNO bia el ngam lo ruang ah Lai Phunpi Ni ( Chin National Day ) kha Falam ah 1961 February 20th ah a tuah pi than hna. Kawlram Vuancichuk U Nu le afanu, US Ambassodor Mr. Snow hna nih an rak tel pi ve hna. Tawhlanzi Cozah chan 1966 kum ah Ralkap uktu hna nih Lai Phunpi Ni (Chin National Day) kha Chin/Lai Special Division Day tiah thlen awk an rak izuam. Lai Upa tampi nih fak piin an rak el.
                                          Lai Phunpi Ni (Chin National Day) caah Pa can a simi Pu Vuantu Maung zong Halkha ah a ra i fianternak tampi a tuah. A kir lei ah Motor Accident in a thih caah Laimi tampi an lung a suk dih. Laimi sin in duh lonak a langh tuk tikah Tawhlanzi Cozah lei in Lai Phunpi Ni    (Chin National Day ) tiin an pom than i Natioanl Day tiin a min a hmun than. Mahsahlah Cozah tuahmi Burma Constitution (1974 ) ah Lairam kha Chin/Lai State tiah January 4th,1974 ni in auh a si. Ralkap cozahnih Lai miphun hi hloh a duh caah National timi biafang hman khawh lonak kha a phunphun in a kawl. Cu caah Lai Phunpi Ni ( Chin National Day) kha Chin State Day tiah nan auh lai tiin 1986 kum in fak piin Laimi hna sin ahnawl a chuah i nihin ni tiang, hmunkip, pengkip le caankip ah hnahnawhnak harnak tampi a pek lengmang. A si nain Laimi hna nih kan thutdirnak hmunhma poh in Lai Phunpi Ni (Chin National Day) cu, theihhngalh than lengmng a si caah kan miphun caah ruahchannak tampi a um tihi kan tuanbia ah a lang. Cu ticun Lai Phunpi Ni (Chin National Day) cu,Laimi caah, lungkhat thinkhat le lungrual tein khua khannak ( Unity ), Kanmah kong kanmah duhning in khuakhannak nawl kan ngeihnak ( Self Determination Right ), Kan miphun hmelchungnak ( Identity ), le Miphun dawtnak le tanhnak lungthin a langh ternak ( Nationalism ) a si tihi zungzal in theihpeng awk ah forh duhmi cu a si.Kaa lawm.
By Lian Cin

Hmunseh Lairam

Sat, 26 Feb 2011 17:30:13 +0100

Lai miphun hna chuahsemnak Ram
Lai miphun tlonlennak Ram
Cung Pathian thluachuahmi Ram
Daihnak cerhti putnak Ram
Aa dawhbik ko kan Lairam
Hmun niam nel ah si lo in
Tlang dang cung tlahmi khua bang
Leibo dang tlang sang cung ah
Cer ditdet in maw Lairam
Ram kulh chung ah tlang sang sang
Ralhruang kulh bang i suang hna
Ram chung tingtlang sang hna nih
Leilung hmun chung Lairam ca
Nun hmang dingin bia hreng hna
Kan lung ti lai, Run tiva bang
Dawtnak Rili lei panh in
Kan thil thial khawh lo ding in
Kan een ti lai, Chokhlei par dawh bang
Leimi nih phailen awk in
Kan kar lai hmai lei panh in
Thih thih khat, Nun ah tthen loin
Tlangsang tamnak Lairam
Tiva te tamnak Lairam
Ramsa tamnak Lairam
pangpar phuntlin tamnak Lairam
Holh phun tamnak Lairam
Zuuva tamnak Lairam
Nunphung tthattha, thilthuam tthattha
Lam phunphun, zaihla phuntling
Ho van hai loin, Angei i a rum ve mi
Lairam chung um, Lai miphun
Lairam fingtlang, Lairam tiva
Lairam thlizil, lairam thingram
Lairam nunphung, Lai miphun
Vawlei dongh tiang, a hmunlai
Hmun hramseh kan Lairam
A vawlei hawi ram sinah.

Pastor Za Thawng Cin(Texas, USA)

Lai Phunpi Ni

Sat, 29 Oct 2011 04:05:30 +0100

Lai Phunpi Ni cu Lairam nih Kawlmi ram le adang ram pawl he Mirangkut in Independence kan lak tti kum 1948 Februaryni 20 ah Lairam kaakip ai awh tu cio mipi tonnak nganpi (Conference) Falam khua ah an rak tuah. Cu ni ah Lai Miphun pipu chan in bawichung nih ramuknak nawl ro in ichanh nakphung (Aristocracy) in mipi thimmi hruaitu hna uknak democracy phung lei ah Lairam uknakphung thlen ding ram uk bawichung pawl hna tla te in an ser khawh. Cu Ni cu ni sung lawi ngaiti in “Lai Phunpi Ni" ti in min an peek I, February ni 20 ni fate Lai Phunpi Ni tiah kumtin conglawmh ding zungkhar ni ah an rak ser ve mi Ni asi.

Lai Phunpi Ni thawhkeh ning a chanbia tawite

Lairam hi pipu chan in mah le khua le khuatlang cio I-uknak kha bawichung nih roco in ichanh mi uknak in an rak tleih peng hna. Mirang holh in aristocracy uknakphung ti khawh mi asi. Mirangnih Laimi pipu uknakphung kha aniam tuk in an rak hmuh hna ruanglong ah Lairam bawiuknakphung cu feudalism an rak ti ttheu khi asi .

Cu uknak phung in Lairam i-uk lio lingcing ah Mirang nih India ram le Kawlram an uk ciami ram hnihkarlak i-hlanh nak caah Lairam uktu bawi hna kha Lairam chungin lamsial naknawl peek ding anrak hal hna. Lairam uktu bawi Pu Con Bik te hna le bawidang nih lam sial naknawl an rakpe duh hna lo.

Cu ruangbik ah Mirang nih Lairam an vun chimm. Laimi nih Mirang cu andir onh an doh ve hna. Mirang nih le Laimi kha fawite in an tei kho ti hna lo.

Cucaah Lairam uktubawi pawl kha nanmah le nan uktawn ningte in nan i uk tthan ko lai I, Mirang cu Ramukbawi hna cung in uktu an si ti hngalh nak ah ngunkhuai long nan peek lai timi bia nan hna atlak ah cun raldeih remnak kan tuah lai ti in Lairam uktubawi pawl kha bia an rak peek hna. Mirang peek mi bia cu Lairam uktubawi vialte an hna atla.

Cu caah Mirang le Lairam Uktubawi pawl ralremdeihnak akhua kipn in an raktuah. Cu ral rem hnatlaknak bia cu Mirang nih Chin Hills Regulation 1896(Lairam uknak upadi 1896) tiah an ttial. Cu upadi ning in Lairam a uk lio mi bawichung nih peh te in hlan an uk tawnning te in Lairam cu Mirang kut toi ah ro ah I chanh in an uk tthan ve.

Lairam cu Kawlmi ram, Kachinram, Shanram le adang Karenram, Kaya ram timi mi phun ram he kanramciote ah I-uknak zeimaw zat cio a ummi komh mi rambupi uknakphung (Federal) in Kawlram bupi (Union of Burma-Pyihtaung su Myanmar Naingan) ti min in I Uk cio awk Panglong ah aramcio ai awhtu uktu vialte nih Kawlmiram tel in 1947 February ni12 ni ah min an thut. Cucaah, 1948 ah independence kan hung hmu tti dih hna.

Cu tik ah Independence hnu in Lairam uknakphung hi roco in bawi chung nih ichanh mi uknak phung Lairam uknak upadi 1896 kha maw kanpeh rih lai maw, mipi thimmi hruaitu nih ukmi democracy uknakphung ah maw kan thlen lai timi kong kha iceih ding arak si. Cukong ceih ding hrim ah Lairam kaa kip aiawh tu vialte Paletwa peng ramuk bawichung zong tel dih in tonnak ngan pi (Conference) kha Falamn khua 1948 February ni 20 ni ah cankarlakchung Lairam uknak atlaichungtu Chin/Lai Afairs Councuil nih an tuah.

Cu conference ahcun cunglei kanttialcang bantuk in ramuk bawitampi aa telmi zong nih ram uknak nawl bawichung nih ro in ichanh mi uknak phung hi chanhnu adon mi asi cangcaah mipi thimmi hruaitu hna nih ramuknak phung asimi democracy phung ah thlen ding an hna a tla ve. Cu caah bawichunghnatlaknak telh hrim in mitam deuh hnatlaknak in Lairam cu mipi thim mi hruaitu nih uknak democracy phung ah thlen ding hnatlak nak 1948 Februaryni 20 ni ah bia an rak khiah.

Hi bawichung nih ro-in ichanh mi uknakphung in mipi thimmi hruaitu hna nih ramuknak tleih ding timi cu Bawichung paw lhnatla te asi ning tette alangh khawh ning:- Ramuk bawipawl hi conference ah tampi ankaive I hi thlenak tuahding ramukbawi pawl hna tla te asi mi hi zei nih dah avun langhter rih kanti ah cun Ramukbawi vialte kha an uk mi hna zatlang mi an michia (Subjects) sin in kum ngachung maw kumhra chungmaw an hmuh ding khuachiah rawlrel le ngunkhuai caah a hlum in cozah nih pawnnak tangka anrakpeek dih hna.

Tahchunhnak ah Zahau le Hualngo khuatlang ukbawi Pu Thang Tin Lian(Pu Za Hre Lian apa) zong nih a uk mi hna zatlang michia(Subjects) sin in kumngachung maw kumhrachung maw an hmuh ding khuachiah rawlrel le ngun khuai zat he aa tluk kho ding an peekmi hna pawnnak (compensation) tangka cu Pu ThangTin Lian fapa pakhat asive mi Pu Ttial Dum nih apa ai-awh in arak chuah ti theihnak a um.Asilo ahcun asilo ning a ttialmi an hung umkho ko.

Pu Thang Tin Lian ukbawi hna chung bantuk in Tedim le Ton zaang peng hna Uk bawi Pu Pum Za Mang ai-awh zong in a roco tu nih cu pawnnaktangka cu an lak ve ti intheih a si. An uknak akau mi ukbawi veve an si caah an hmuh mi pawnnak tangka hi atlawm hrim lo ti asi.

Hi pawnnak tangka ukbawi hna nih an lakmi cu roco in chanh mi uknakphung in mipithim mi hruaitu nih uknak democaracyphung lei lthlen nak kha ukbawi vialte nih kan hna atla ko ti an langh ter nak hrim cu asi.

Cu hnu ah Mipi thimmi hruaitu nih Lairam uknaktleih ding Falam Conference biachahnak cu an hna tlak caah Pu ThangTin Lian fapa pakhat asive mi Pu Za Hre Lian cu MP ah aa cuh I Falam mipi zatlang nih an rakthim I Lairam le Laimi kong ceihtu Lairam mipi thimmi MP Chin Affairs Council 14 hnatlate in Minister of Chin/Lai Affairs Ministry ah an thim mi nih hi uknakphung thlennakruang ah Lairam bawi le zatlang michia(subjects) kar lak ah I ralnak le I entau nak hna hnawhnak zei hmanh bawichung nih siseh zatlang michia nih siseh an rak tuah lo i tluangte in an kap hnih hnatla lungtla veve in thlennak an tuah ti afiannak ngai asi fawn.

Lairam a uktu mirang Governor kha Lairam le Lai miphun kong ruahnak petu Counsellor ah rak chiah mi Pu Vum Ko Hau hi Thuklai Bawifapa arak si. Mipi thim mi Chin/Lai Affairs Council thim hlan deuh ah can karlak ca dirh chung mi Chin/Lai Asffairs council ah hin Haka south can karlak MP mi anhmuh hlanah Pu Vum Ko Hau cu Halkha peng Mp pakhat in arak tleih chung .

Culio ah thimhlanchung cankar lak Chin/Lai Affairs council hruaitu Chin/Lai Affairs Minister thimnak ah Bawi lei ttang Pu Vum Ko Hau le zatlang lei ttang Vom Tu mawng pa hnih mee an rak icuh. Cu lio ah hin Halkha peng Ukbawi vialte nih an ai aiawh in an thimmi asi ruang ah Panglong minthu mi Pu Kio Mang hi Halkha ukbawi in Halkha peng MP asi. Cu ruang ah 1947 Kawlrambupi uknak phunghram a ttialtu hna ram bupiphung hram a ttialmi ramhruaitu chungah arak itelve.

Cu lio ah bawilei ttang mi Vum Ko Hau mee peek deuh lo in zatlang chialei ttang Vom Tu Mawng tu mee ka rak peek deuh ti in achung bia Pu Kio Mang nih arak ka chimh bal. Cu pin ah, Falam conference ah mipi thimmi hruaitu nih uknak tleiding ti bia an chah hnu cun ram-ukbawi siruang in MP ka si hi sullam angei ti lo ti in Pu Kio Mang cu amahte in MP asi nak in achuak . Midik ngai asi ning fak awktlak hrim asi. Cuhnu ah mipithimmi hruaitu nih uknak tleih ding lei a ttangve mi tthiam Phaipha uk bawi fapa asive mi Pu Lian Tthum cu amah Pu Kio Mang zaka MP ah arak luh ning Pu Lian Tthum nih arakka chimhbal ve.

Pu Vum Ko Hau cu Pu Vomtu Maung he mipithimnak tuahhlan can karlak chung Chin/Lai minister rian ah thimnak arak icuh micu cu Mipi nih thimnak tuah hlan can karlak chung Halkha thlang lei MP asi nak arak tleih chung lio can a raksi ve. Pu Vomtu Mawng he minister ding mee an I cuh mi mee asungh hnu in zeihmanh hnahnawh nak biatamnak tuah ti lo, daite in in Embassodor rian nganpi ah arak I tthial in theih asi. Haka thlanglei MP ah cun Pu Sang Ning tu a hunglut tthan in theih asi. Angaite ah cun pengdangcu kan theihna lo na in Halkha MP tthing hna vialte hi hlanchan ruahnak in kan ttialhna ah cun Bawichung hrinthlak ti aa ruatmi longte anrak si. Pu Ralhmung Nguntual bawichung, Pu Hrang Mang amah hrim hi TT.Farawn Cenhrang ukbawi, Pu Ro Thang Hlawnching bawi, Pu Hrang Nawl apa lei ah Zathang hrihhruai bawi, anu lei in Hripi bawihrin thlak, Pu MangTling Cinzah bawi, Paw Khuaming Tingsi bawi chung ti ban tuk in an si dih ko hna. Asina in roco in Bawichungnih ichanh mi uknakphung nakcun mipi thimmi hruaitu hna nih uknakphung cu an I-thim deuh dih ko cuta!!.

Bawichung nih roco in ichanh mi uknakphung aristocracy in mipi nih thimmi hruaitu hna nih uknakphung Democracy lei athar in thlennak kong ah ram-ukbawi he ukmi zatlang michia lei he lungrual le lungtla te in an pawm tti dih mi a cung lei kan ttial bantuk in asi diam ko cang. Atu lio Lai Phunpi Ni conglomhnak zungkharni kong ah biane a thawhter tthan duhmi nih a tu ah bawichung nih roco in uknak ichanh mi aristocracy phung cu hman tthan ding hi an mah bia-ne aphawk duh mi mi zeihmanh zong nih an duh kho ding uknakphung zong asi ti lo. Hnatla te in an khiahcio cang mibia asi ruang ah hi kong biatam awk zeihmanh a umti lo mi asi. Cu thilsi ninghrim cu democracy phungcu asi.

Cu Falam conference bia-khiah mi cherh chan in Lairam uktu hna bawichung zaka ah a khua le akhuatlang tete in uktu khuabawi le an council le Khuatlang uktu Chairman le an khuatlang Council kha mipi nih thim mi uknak in Chin/Lai Special Division Act 1948 ti mi kha Kawlram bupi Parliamnent nih Chin/Lai Affairs Council hna tlaknak he upadi an ttial ttthan

Cucaah Lairam uknak tthing Chin/Lai Hills Regulation 1896 kha hmang ti lo in , Chin/Lai Special Division Act 1948 upadi kha Independence hnu Parliamentary democracy in Kawlrambupi uk liochanchung 1948 in 1962 hnu tlawmpal tiang hrawng cu khuatlang uknak phung cun Lairam chung uk dih arak si. Ralkap uk chanhnu ah cawiliamter mi bia pawl ceih tik ah Chin/Lai Special Division Act cu hmanrih asi. Sualkeibia zong ah Chin /Lai Special Act 1948 chungning zulh khawhmi zulh ahung si. Asinain khuatlang uknak Chairman le an council thimphung kha Kawl ralkap cozah nih an zul ti lo i ralkap bawi nih an duhmi hna paoh kha khuabawi rian an peek hna.

Cu February ni 20 Lai National Day ti min in kawh ding bia a khiaktu hna cu mipi thimmi hruaitu um hlanchung Lairam uknak atlai le ahruai chung tu hna Lairam le Laimi kong a ceih khangtu Laimi Council pawl (Chin/Lai Affairis Council –Lai-ye-ya Council) an si.

Cu Lai Affairs Council mipi nih thimhlanchung ah Chin/Lai affairs council rian arak tlaichung tu hmasa bik Lairam le Laimi kong a khang tu hna“Chin/Lai yeya council - Chin/Lai Affairs Council hruaitu hmasa hna ah Pu Vomtu Mawng (Minister of Chin/Lai Affairs Ministry), Pu MangTtung Nung Parliamentary Secretary of Chin/Lai Affairs Ministry, le Pu Lian Tthum (Chairman or speaker) of Chin/Lai Affairs Council an rak si. Mipi nih thimnak an tuah hnu ah cu Chin/Lai Affairs council cu Lairam mipi nih thimmi Union MP 14 an raksi.

February ni 20 ni kha “Chin National day /Lai Phunpi Ni” tiin min an peek I Lairam chungah zungkhar ni holiday ah hman khawh ding cu Kawlram bupi cozah nih hnatlakpi mi ni zong asi.

Zeicah dah February ni 20 thingmang ni hi Lai mipi kaakip aiawh tu mipi tonnak ngan pi conference ni ahcun an rsak tuah:-. Pu Vomtu Mawng nih hin 1937 hlan hrawng hin “Chin/Lai amyotha ngingua -ye Party- Chin/Lai Unity Party” ti mi hi arak tuah thawk ni he siseh, cuhnuah Magwe ram tthen uktu Mirang Mangki a ttuan mi Kanpetlet ah uknak rian in khual avuntlawn lio ah Pu VomTuMawng hruainak in Mirang uknak kanduh ti lo vakir ko ti in Kanpetlet ah doh an rak au hnawh. Cu tik ah Magwe Mangki pa cu Kawl khua Saw khua ah an rak zam ter. Cu an rak zam ter ni le Chin/Lai Unity Party an rak dirh ni hna tonhchunh khawh dih mi ni Feruary 20 ni cu Falam conference tuah dingni thingmang ah an rak khiah mi aruang cu arak si.

Hi Magwe Mangki Kanpetlet I doh an rak au hnawh nak kong hi Kawlram mipi nih an icawn dih cio suallai ti phan ah tadinca zong ah ttial lo ding le mizeihmanh nih hi kong mipi sin nan chim nan thanh lai lo timi hi Kawlramuktu Mirang cozahnih khap mi bia arak si..

Asina in U Aung San nih Danuphiu khua ramkhelkong mipi sin bia achim lio ah hikong a phuan ti asi. Cu caah U Aung San cu tleihding asi i ramdang ah arak zam kha asi ti asi, Ramdang azamnak ah hoikom 30 hna timi “yebaw tung ceih” a va dirh I Kawlram dothlenak athawknak ti arak si.

Curuang ah Kawlholh ah cun “Bamah ttaw-hlan-ye a sah Chin/Laitaung kah” tihi chim ttheu mi bia arak si in Ne Win chan Kwlcarel tangthum hrawng cauk ah ttial balmi arak um .

Falam khua mipi tonnak conference ni cu February ni 20 ah amah Pu Vomtu Mawng Lai Affairs Minister asi lio ve asi caah Lai Affairs Council zapi hna tlaknak in khiah mi cu arak si.

Zeicah dah February ni 20 Chin/Lai National Day ti min thing mang an peek: Kawlmiram le adangram pawlhe komh in rambupi dirh tti ding Panglong hna tlaknak in Independenvce ram vun si tik ah Lairam cu Mirang uk chan hlan bantuk in amah ramte in aa uk mi ram asi ti lo. Miphun dangram he rambupi chungah ram kulh palkhat long in vun itel ding asi .Cu tik ah Lai miphun nak milu tam deuh le ahung cho deuh mi miphundangramkulh nun phung le holh te hna nih Lai miphun holh le nunphung kha duhsah tete in a vun chilh khawhnak lam a um ti kha cu chan lio Lairam hruai tu Pu Vomtu Mawng le aho hna nih siseh an hnu in a vun changtu hna Lairam hruaitu hna nih siseh an rak hmuh chung khawh.

Cu caah Falam ah tuah mi Conference February ni 20 cu Lairam kaa kip Lai miphun ai-awh tu le ram uk bawi hna lung rual te iton tti mi bantuk hi Lai miphun chanbia ah hmasa bik lungrualnak hmuh ni zong as; Lai miphun khuasak tti nak kaakip ah rak hman rak zulh bal lo mi mipi thimmi hruaitu hna nih Lairam kha democracy phung in vun ukding bia khiah tti dih khawh cu Lai miphun chanbia ah a um ballo mi a thar in a um mi democracy khuadei hmasat bik ni hrim zong asi.

Cu caah techin-fapar tiang in hi chan lio pipu hna hmun khat ah an lung aa rualmi bantuk lungrualnakpeh peng ding hngalh tthannak ni caah siseh law hi ni ruang ah Lai miphun vialte kan miphun ah aa khat mi kan simi lung rualnak um zung zal te seh tizong an rak ser hnawkchanmi ruahnak arak si.

Cun hini ah hin Lai miphun nunphunng thilri zeizong hmusak langhter nak tuahkhawhnak nican le Laimi ca-holh tthanchoternak caah tuah mi ni si khawh nak le , hi lomnak ni can ah Kan miphun nunphung hla le lam zong langhter in lomhnak tuah nakcaah hi ni ah lamding sakding practice an tuah le an cawn mi nih kan miphun nunphung hman zungzal le lenh zungzal nak tha akan peetu asi lai ti hna kha an rak hmuh le anrakruahmi asi

Hini kanconglomh ding nuamhnak ni ah Lai miphun hrin thlak te-fa hna nih hi ni an zawh le hi ni nuamhnak an hmuh mi in Laimi miphun hrinthlak kan si ti I hngalh thiam nak le Laimi miphun tleihchannak dawtnak ttanpi ding ruahnak le sianlonak thinlung ngakchia nih an tthan pi khawhnak hnga an thinlung asersiam tu hna nizong ah siseh tihi biapi ngai in an ruah mi asi.

Cu caah hi February ni 20 cu Chin/Lai National Day Laimi miphun tlau ti lo hmunh zungzalding ah lam a kanhruaimi ni ah an rak sermi ni hrim cu asi.

Cu chanlio democracy thimnak in ihruaiding bia anrak chahnak thawng in atuchan ah pumsa lei khuasaknakchung I-hruai nak ah siseh, biaknak lei I hruai nak:tahchunh nak ah:Minobu hruaitu thimnak, nubu thimnak, Krifa upa thimnak, ti bantuk tiang in Lai miphun kankhua saknak he tthentthiasm lo mi in mipi thimnak tuahmi democracy phung cu hmanlo awk ttha lo in kan vun hman cang. Cu tik ah Lai miphun le democracy phung ticu adangdang in akal thiam lo mi pakhat in kan vunruah le kanvun i-ngeih cang ti afianter ngaicang.

Cu ti Laimi khuasaknak le democracy thimnakphung tthen thiam lo in kan vun ngeih mi nih Laimi miphun khuasaknak nunning chung hrim zong ah democracy thimnak hmanlo tthalo in avun chuah ve mi nih February ni 20 kha Lai Phunpi Ni ti min an rak peekmi hi an rakthiam khawh ning a dik tukmi asi,

Hikazon reltik ah “In the beginning was the word, and the word was with God, and the` word was God-A hram thawk ah bia aum; bia cu Pathian he a um I, bia cu Pathian asi” timi Bible cacaang Johan 1:1 bantuk khinrel awk ttha asi

Hi ni ah kanbiak micio sinkip ah Laimi phun le Lairam le hi Lai Phunpi Ni a hmunh zungzalnak ding Lai miphun dih umnak in thla kan cam hrim ni zong asi.

Pu Lian Uk
Chinland biaruahnak ta lakmi asi.

Lai Phunpi Ni Cawnglawmhnak

Sat, 05 Mar 2011 17:39:05 +0100

Kum zabu 21nk kan luh lai ah, vawleipi cu a thin a rak phang tuk. Number 1999 in tuahmi kompeuter vialte nih number 2000 hi an tlaih khawh lo sual ahcun an thirnung (seh) vialte an dir dih sual lai ti an rak phang. Biaknak lei in 2000 cu caandonghnak ah a ruatmi zong tampi an um. Nain, Pathian khuakhanning cu aa dang. 2000 chung kan luh tikah Lai miphun kan caah ruah bal lo mi thil a cang. A tthangchomi ramdang ah Pathian nih thawng tampi a kan phanhter. An rumnak a kan co ter ve. Cu rumnak hna cu Lairam ah khua a sa mi nu le pa le chungkhat le khrihfabu hna nih an tem khawh ve. Lairam inn le lo hna zong rang cur in an um ve cang. Pathian nih kan miphun lam a kan hruaining hi khuaruahhar ngai a si.

Nihin Lai Phunpi Ni 2011 cu kum dang he aa lo lo. Lawmh cio kan duh. 2000 pin lei ah kumhrabu pakhat kan lonh hnu ah kumhrabu pahnihnak aa thoknak kum a si. Kumhrabu pahnihnak chungah Pathian nih kan miphun hi lawmhnak, dawtnak le remdaihnak thluachuah he lam kan hruai ko seh!

Ram le miphun caah rianttuan hi zumtu hna kan rian a si ve. Bible nih a kan cawnpiak. Kan miphun caah Pathian sin ah thlacam usih. Ramdang kan um lio ah Lai ngaknu le tlangval hna nih Lairam ah nanmah ngai in a ttap tawnmi nan nu le cu philh hna hlah u. Sunghno kan nu le hi khuazing thinlung pu in hnuk thlum a kan dinhtu an si. Bia dang in, Lairam sertu an si. Nu le pa dawt hi Lairam dawt a si. Lairam in a kan ngaitu nu awthlam ka theih mi hi Mother's Day 2009 caah ka rak ttial bal. Lai Phunpi Ni ah miphun hringsortu kan nu le kong cu rel tlak a si ve ko rua tiah a tang ah ka van langhter.

Lairam Hringtu Nu upatnak (May 7, 2009)

Hringtu Nu le Ni kan phan tthan cang. Mitthlam ah tleicia kan nu le mui an cuang tthan. Lenglio nu le hna mui aa dawh khun. An thisen in hrinsormi fanu le fapa hna mit ah vawlei cung nu vialte lakah aa dawhbik nu ti dih an si. Kan nu le cio kha mitthlam ah van cuan ter hna usih.

Kan nu le nih thla kua chung a kan pawi. Lairam ahcun naupawi ruangah an i din kho hlei lo. Lo ah a kankalpi. Fing le hawr kuang kip an zawh. Thing an hlam. An phur. Facang vuitun an phur. Lo an kan thlawhpi. Thingkung cung ah kai herh can a um. An pawpi he lamcho an kai. An hni kha an paw nih a cawi. Ngalrek langh hmanh a siang lo mi kan nu le cu an tanpor cung tiang hrim in an hni aa hlim. An i veng peng. Retheih baak ah ningzak nawn in an um. Zing zan a chuak. Fa dawt ruah ah tuan te ah a tho. Fa le caah rawl a chuan. Lo ram ttuan ah a kal tthan. Thlan he inn ah a rak tlung tawn. Ram kal lio ah fa le caah thingkung kip a ngia. Theipi kung hram a bih. Theipi senduk tete a hmuh hna. "Maw, khuazing! Cu tak cu! Aw, pate caah, nute caah, cu ka thin, a ti. A thinlung cu a sertu Pathian sinah lawmhnak he a phan. Theipi cu pakhat hnu pakhat in a van lawh. A chem pah. Thianghlim tein a tuah hnu ah a hni hliah in a fun. Tlun lai aa ngaih tuk. A thilritpi cu a zang huap. Fa le dawtnak ruang ah.

Ku-tlertlur tiah thing ngalh thawng a thang. Fa le nih ka nu, an ti. Inkaa in fa le an chuak. Van zoh ah a thlan hripi he, a sam zong choi viar in, hmaikhah lo awk dengmang in. A hmai a panh tuk tthiam. Fa le nih khuhlu tal akan phurh hnga maw an ti. Sei an zoh ah zei an hmu lo. Thachia ngai an lo. A hni hliah in a fun i a paang ah a pawi mi theipi cu a van chuah. Fa le cu merh zimziam in. Nubik cu aa lawm tuk. Nun chung vanram ciamman. Mawtor he ramttha um he dang hlah. Lawmhnak cu thinlung in tah a si. Rumnak le ngeihchiah in tah a si lo. Lairam sunghnokan nu le lawmhnak cu a sangbik a si zungzal ko.

Nihin sunghno kan nu le hna lennak Lairam cu a tthing chin lengmang cang. Thing le ram a car cang. Thingphurh ah meng tam kal a hau. Theipi kung zong an tlai kho ti lo. Khuhlu hmanh nih ciam an ser cang. Hringtu nu le fahniang rual lawmhnak cu a tlau cang hnga maw? Hringtu nu hna cu an li a leeng. An dawtmi fa le hna nih mithmuh lo rili ral ram ah an pehtaak cang hna. Nu le thinlung cu Lairam lawng ah a leeng kho ti lo. Fa dawt le umnak mithmuh bal lo ram kha an ngai. Zing zan a chuak, lungleen le lileennak lawngte an si cang. Tintling cungah a co val he hmanh me rem thiam kho ti lo. Ka caah lei cung nun hi! a ti cang.

Lo ram ttuan ah kal a hau. Thing le ram nih hnawl mi ko hi a lo cang. Thing le ram cu a caah duh a nung kho ti lo. An car. An phawng dih cang. Lairam dawhtertu par ttha hna an ziam dih. Hring dildel Lairam ti mi kha phawng tululpi ah a can hnik cang caah. Ruah khawh mi dang a ngei lo. Cu ngai Lairam leen le ttuan har cu ti lawng kha a thinlung ah a khat. Pasal santlaih lo ah a phawt deng mang. An mawh lo, an mawh lo. Lairam duhnunnak a tlau cuahmah cang caah.

Hringtu sunghno nu le hna lennak Lairam cu Kanaan ram ah kan ser lai kan ti lo maw kha! ***Tho usih law sa usih. Hringtu nu hna lawmhnak caah Lairam ser tthan hna usih***

Lairam in Hringtu Nu Aw

Zan khua mawt i, tintling cungah,

Runuk na pa, he zau zawn ah
Thli lungkil in, kan hlam tawn e,
Dawt pahar hniang, hrin semmawng kha.
Hung kir hnga maw, tin lung ka nawl.

Nang liam ni cu, Lai lungrawn ah
Mitthli rual he, khua za ka cuan,
Nang len tawnnak, kan chum tual le,
Zalam tlang nih, rung hmun hna e,
Kei lungfahnak, zual ter hna maw.

Ka cung a zuang, thir zuamthiam aw,
Dawt pahar kha, phur ve maw e,
Tluang chin ah e, lan lai an ti
Kut zattial tlaih, um thiam ri lo,
Lungsak kho lo, tthen thai lai cu.

Ni thla ka rel, nang zun ngai in,
Ttuan zaang tlung lo, nang bau hnu cun,
An chim tilim, sia nu fa bang,
Tthen a fah cu, tuar har tuk ai,
Lung ngam tertu, um te hnga maw.

Ka zanmang ah, panh siarmar in,
Hung cuang ai kaw, hrin semmawng cu
Za in chan lang, ka ti zawn ah
An ka biak ttha, si ttung ri lo,
Kei lungfahnak, zual ter chin e.

Cung khuazing nu, zangfah kan nawl,
Dawt hrinhniang ca, thla za ka cam,
Rauthla in e, za cu tlai law,
Nang fadawt ttha, si ter hram ko.
Vanram nuam i, tawn lai nak ah.

Mother's Day ni ah kan nu le tthatnak lawngte ka ruat. Lairam in hringtu nu vialte hna, an fa le zun ngai in an tuar ding ning ka ruah ah ka lung a hno. An hraamnak aw ka theih teh a si ko rua. (Rev. C. Duh Kam, May 11, 2009, Mother's Day Thaizing)

Voi 63nak Lai Phunpi Ni lawmhnak caah thlacamnak he,

C Duh Kam

Chin Baptist Mission Church

Washington, DC