laimi-le-lairam

Lai Phun Rual Hna

Wed, 23 Mar 2011 03:12:32 +0100

Laiphun Rual Hna

By: Sam Biak

Hlan-ah cun, zalongte'n rak tlawngleng hna,

Khat le khat dawtnak ngei in;

Thih ngamh-in, dirhkamh hna kan Lairam cu,

Laiphun hovanhailo ti-in;

Zelennaak kan Lairam rak ti hna maw;

Pa raltthan rual hna nih cun,

Nunnak tiang rak pe hna, Lairam ca-ah,

Laiphun an sinak kha rak ttanh hna maw;

Hmanhsehlaw chanthar chan ahcun,

Kaa long a chimmi Laiphun tam hna;

Vai uknaak tang um ruangah maw,

Thih ttih ah Laiphun cu zuar hna;

Hlanlio Lai nunphung te kha ti'n,

Chanthar mino cheukhat cu,.

Hram hna maw Lai nunphung zuun-in.

Laiphun ca'h mitthli aluang maw;

Lairam mitthli he a ttap,

A ttahnak awthawng nih, Laimi akan uah cang;

A mitthli kan ca-ah a thlak,

Hodah dirkun lai Lairam ca-ah?

"Laiphun rual hna

Lai Miphun Dothlennak Tuanbia

Sat, 19 Mar 2011 05:26:21 +0100

Biahmaitthi
Kum zabu 18 lio chan British, France, Spain le Portugal ram hna nih Africa le Asia ram tthen hna ah colonial ram kauh duh ah ral an rak doh hna. Kum zabu 19 thawk ka hrawng ah Kawlram ah British nih ral rak doh hram a rak thawk. British nih Manipur ram a rak doh i kawl pawl cu Manipur in a rak dawi dih hna. 1924 kum ah Arakan le Taningtari cu doh hram a rak thawk. Kum hnih leng ral a rak doh hnu (1824-1826) kum ah Arakan, Taningtari le Lairam (Lailand or Chinland) cheu khat cu a rak laak hna. Mah British nih a doh hna ah hin Lairam (Lailand or Chinland) thlanglei a ummi Lai miphun hna nih an rak doh ve hna i, hi dohnak ah Mi Wah, Ku Wah, Sit Taung le Maung Hnamah ral i dohnak cu a rak lar ngai ngai. Lai miphun hna nih fei le nam hmang in an rak doh hna na tein meithal a tlaihmi mirang (British) cu an rak doh khawh hna lo caah 1826 kum chan lio ah Paletwah ram cheu khat hna cu British kuttang ah an rak tla. British Colonial pawl nih 1765 kum lio ah Silcar le Silong ah siseh, 1885 kum ah Kawl mi umnak ram a rak laak dih hna. Mah hnu cun Lairam (Lailand or Chinland) ram tuk dingah caan`ha a rak kawl i (1871/1888/1889) kum hna ah ral voithum khel te a rak tuk i Lairam (Lailand or Chinland) `henkhat cu a rak laak khawh. Daihnak le luatnak, zalonnak a rak duh zungzalmi Lai miphun hna nih anmah le an peng ram cio in an ngeihmi hriam le nam hmang in an rak doh hna. Mah ral cu a rak ngan, a rak `hawn tuk caah, Mirang pawl zongnih harnak tam pi le temhinnaktam pi tuar in Lairam (Lailand/Chinland) hi an rak laak. Hi raltuknak hi zeitluk in dah a minthan ti ahcun mirang pawl nih ca in an rak `ial ning, an rak i thanh ning ah le mirang ralkap i a sang bik an i pekmi laksawng (Victoria Cross) an i pekmi ah siseh hmuh khawh a si. Lai miphun pawl nih anmah le an nawlngeihnak a tlak lonak ding le mi tang i sal can ah tan ding rak duh lo ruang le Lairam (Lailand/Chinland) pi mikut tang a tlak lai ding an rak phan ruangah nunnak tam pi thap in ral an rak doh hna. Mah raldoh nak ah Pu Cawn Bik, Pu Khai Kam, Pu Lal Luai, Pu Za Hat, Pu Hausat hna cu mi lar, mi
minthang an rak si. Mah mirang ral ah hin hriam nam i thleidan tuk ruang le minung thazaang i kha lo ruang ah 1895 kum ah Lairam a tam deuh cu Mirang kut tang ah a rak tla. 1914 kum lio ah Germany, Austria, Hungary, Turkey le Bulgaria hna phukhat, England, France, Rusia, American hna le a dang ram hna kha phukhat tiin ralpi an rak tho. Ral i dohnak ding caah anmah le an ukmi ram hna i a ummi miphun hna cu ral do dingin an rak tlaih hna. Kum 1916 lio ah England colonial kuttang a simi India le Kawl ram ah ralkap a `uan ding in minung nuai 1 le ral do lo ding in minung sing 5 cu Iran, France, Turkey le Mesopotamia ram hna ah an rak kuat hna. Mah ah cun Lai mino (4000) leng cu Europe ram ah an rak kuat ve hna.1917 kum a rak phak tik ah British pawl nih ralkap ttuan tthan dingin mi an rak khomh `han hna. Mi an rak herh tuk caah Lairam pengtlang kip cio ah mi (1000) nan rak kawl hna lai i nan tlaih hna lai tiin nawl an chuah. Lai miphun pawl nih a hlan i ramdang a rak kal i ralkap `uanmi hna an rak kir lomi kha theih hngalh le fimnak laak in ralkap `uan ding ah an rak duh lo. 1917 kum September thla ah mipi nih duh lonak an rak langhter. Mipi nih duh lonak an tuahmi hi Mirang pawl nih caan`ha hmang in an rak doh hna. Mirang nih khua mei in khangh leng ah facang chiahnak rawlruk zong a rak khangh dih. Mipi a tlaih hna i a rak hrem hna. Hi dohnak zongah Laimi lungkhat ttantti le hmun khat te dohtti a rak um lo caah 1923 ah a rak dai tthan.

Chin National Union (CNU) Lai Miphun Fonhnak
1900 kum hramthawk lio ah hin British hna nih Lai miphun hna cu Palik, Assam Rifle le Kawl ralkap (meithaltlai) hna i battalion le Lairam ralkap ttuan ding ah an rak tlaih, an rak auh hna. Kawlram chungah ramdaw mino hna nih Kawl mibu (Burma National Union) an dirh i ram caah rian ttuanhram an rak thawk. Mah caan lio ah cun Chin miphun mino a simi hna Vumtumaung le Aung Min hna zong nih Chin National Union (CNU) Lai Miphun Fonhnak an rak dirh ve i ram caah rian `uan an rak thawk colh ve. 1933 kum ah CNU nih Rangoon ram chung a ummi British zungah Lairam hi mah te uk i khuakhan lairelnak nawl kan pe u tiin anrak hal. Cu pin ah Kawlram ramluatnak le zalennak (Independent) nan pek hna a si ahcun Lairam zong nan pek chih lai tiin an rak hal chih hna. British cozah nih zei bia hmanh a leh hna lo pin ah 1939 kum February (20) ni ah Vumtumang, Wazihlaw, Kipling, Awmna, Aunglin, Amkam, Vumtunaing, Kimang le Lingki hna cu a tlaih hna i thong a rak tlak hna i Japan ral a thawh tiang thong chungah an rak um.

Lai(Chin) People Freedom League (CPFL)
CPFL hi 1948 kum ah Captain. Mang Tung Nung nih a dirh pi hna i miphun caah a si khawh chung in rian a ttuanpi hna. Capt. Mang Tung Nung nih 1951 kum tiang a rak ttuan pi hna nain amah Capt. Mangtungnung hi Lai ramkhel council ah Parliament a si i 1951 kum thawk in Prime Minister U Nu cozah sinah Parliament rian ttuan ding a si caah a rak dinh tak hna.

Lai (Chin) National Organization (CNO)
1957 kum lio ah Lai (Chin) People Freedom League (CPFL) le Lai (Chin) National Union (CNU) hna an rak i fonh i Lai (Chin) National Organization (CNO) hi an rak dirh. Avoi khatnak Chairman ah Capt. Mang Tung Nung nih a rak hruai hna. Amah hi miphun a dawmi a si i, Parliament chungah Kawl thuam hruk duh loin nitlaklei thil thuam (western part dressing) a rak i thuam i meeting a rak kai tawn. CNO hi miphun a dawmi nih an rak dirhmi a si bantuk in zapi nih an rak pom (Support) hna i ramchung upadi ning in miphun caah rian an rak ttuan.
By: Henry Thang Kip Mang

Hi capar hi Lai miphun dothlennak aa thawknak in nihin tiang kan
tuanbia a si caah Lai miphun a simi nih kan theih a herh ngaimi tuanbia
a si. Zarhfatin peh khawh peng kan vun zuam lai.—Seihnam

Lai Miphun Khat

Sat, 19 Mar 2011 05:18:57 +0100

Semnak aa dang
Fingtlang aa dang
Sining aa khat
Lai miphun khat

Ruah ning aa dang
Kan holh aa dang
Kan rong aa khat
Lai miphun khat

A thalpalaang siseh
A bawktakhup siseh
Amah la ...la...
Lai miphun khat

A thlum ah siseh
A al ah siseh
A thawtnam aa khat
Lai miphun khat

Vakok siseh
Vapual siseh
Taarmi aa khat
Lai miphun khat...
By : Ram Nei Hmung

Laimi Sin-ah Baitawi Cahmi

Sat, 19 Mar 2011 05:28:12 +0100

By Rev. Dr. Dennis Shu Maung
January 16, 2011. Sunday

Laimi hi Dothlen kan hauh cang.

1. Laimi le Pathian
Laimi le PT hi tthen khawh kan si lo caah i lawm hna u sihlaw Pathian cu thangtthat u sih. Laimi hi PT nih a kan thim lawng siloin kanmah hrim nih PT cu kan i thim ve caah Pathian lungput hi kan lungput si ve seh. An PT ah Bawipa asimi miphun cu mimlunglawm an si ( Ps. 33:12) timi kha Laimi hi kan si. Kan lianhngannak ding caah dinnak kan herh (Pro. 14:34). Kan Pathian hi lungfim tein bia usih law a ningcang tein thangtthat u sih. Kan Pathian hi laam Pathian le ttah Pathian lawngah ser hlah u sih. Mah di riamtertu menmen ah ser hlah u sih, kan Pathian a hme tuk sual lai. Lungfim tein PT hi bia u sihlaw, a nawl kan zulh le kan ulhnak nihhin PT kan upatnak le a lianhngan a sunparnak hna hi langhter peng ko seh.

2. Laimi le zu
Laimi hi zu kan duh tuk i zu kan ding, kan ri, kan sual i zu nih a kan tei caah Laimi minung tampi cu zu hi kan Bawi a si cang. Zu din hi thiam hna u sih. Zu hi ri hna hlah u si law thlarau tu in khat deuh cang u sih. Zu hi ngol cang ko u sih. Zu hi zuar ti hlah u sih, ding ti hlah u sihlaw ri ti hlah u sih. Zu rit ruangah tthatlonak le thihnak tiangin kan ton lengmang cangmi kha hngal tthan usihlaw zu hi hrial cang hna u sih.

3. Laimi le Lih.
Laimi kan tuanbia kan zoh tikah Laimi hi kan rak lih ballo tiin kan hmuh. Nihin ahcun "Laimi le Lih" tiin phungthluk bantuk ah a hung chuak dengmang cangmi hi zoh tthan a herh. Lih le hrokhrol hi nunpi hlah u sih. Lihraang zong, lihsen zong, lihnak le lihttial zong chim ti hlah u sih. Thildik le thilhmaan lawng chim u sih.

4. Laimi le Ramdang kal.
Ni thaizing ah Laimi nih kan i zuam bikmi cu ramdang kal hi a si. Fale ramdang a phan cangmi Nu le Pa hna nih theih an duh cemmi cu " na fale pa zeizatdah ramdang ah an kal cang" timi kha a si. Ramdang kal poh ah dollar thei i lawh asi rua tiin a ruat mi le ramdang kal khawh poh ah rum asi rua tiin a ruatmi Laimi a tampinkan um rih mihi ngeihchia a va si dah. Hlanlio i Apoh tuanbia kha kan hluan ko tiah ka ti tawn. Nan fale hi ramdang ah zeitluk in dah harnak kan in i ningtti ngaingai in kan um le miphun dang kut tang ah sal kan taan le khua chel ahcun rawl ei ding hmanh ngei loin kan vah kan veih kha nan kan hngal lo i kafa ramdang a phan cang tiin ke i phiar zau le kuak i pak zau in thli puampi a thlah mi le porhlawt ruamkai in aa tlorh aa nalhmi kan um len cang. Zaangfak kan va si dah tiah ka ti tawn. Ramdang a phanmi fanau hna nih le lungpuam in kan um i Laimi kan si hmanh kha a philh dengmang mi an um. Cun mi cheu cu ramttha ka phan cang ti zau in zeizong vialte a hngal dih le a tuah khawh dih bantuk in bia kan chim, mirum mingei bantuk in bia kan chim i chimh khawh ding le hruai khawh ding in kan um ti lo. A va har dah tiah ka ti chel hi a tam tawn. Cucaah ramdang chuah ding hi ruah len a hau cang. Fa le nau mino hna zongnih mah le mah nan i tei lo ahcun ramdang nan kal lo hmanh ah a ttha deuh lai. Nupi ding le pasal ding in cah nan ton i percel in kuat ding Nan si chinchin ahcun thla cam bu tein khua a fak piin ruah hmaisa a herh. Hi bantuk percel thawng hin hnahnawhnak a tampi a chuak cang.

5. Laimi kan lungput
Mi soi, mi thangchiat, mi namchuk, mi deh le mi zomhteih kan hngal tuk cang. Cun mi hlen, mi eihmuar, hrokhrol le lihchim zong kan nunpi cang. Hihi hlawt ding a si.
Laimi chungah mifim, mithiam le mittha a tampi kan ngei ko hna. Tahchunnak ah Saya Biak Nawl (hla fung 5000 a phuah mi) bantuk in hlaphuah a thiammi kokek thiamnak a ngeimi an tam ko. Hlasak thiammi le muidawh fidi tthattha kan ngei ko hna. Kha hna kha cawihker tlak an si. Cu bantuk tthiamtthiam in Laimi zawn a ruat ngaingaimi sibawi le lambawi hna zong kan um ko. Ca le bia lei in bochan tlakmi tampi kan um ko. Cu bantuk mi hna cu upat pek in cawihler a tlakmi an si. Kan miphun hawi cawihler le upat pek hi kan hngal lo. Upat tlakmi cu upatnak pe cang hna usih. Kanmah le kanmah te i chimthiam in i cawhler u sih, i upat hna u sih. Laimi pasal ttha le nusal ttha kha Laimi nih kan chimthiam, kan cawihler, kan upat hna lo ahcun vawleicung ahhin a kan cawihlertu an um ti lo.
Laimi kan khua hmuhning hi a bi chin lengmang. Lairam pumpi le Laimi pumpi khi ttanh loin mah bu le mah khua le mah tlang lawng kan ttanh. Kan ttanhmi hi a bi tuk hringhran. A kaupi in khua hmu u sih. Mah chung le mah khua le tlang lawng hi ttanh hlah u sih. Bu khuai zau in budang te va dirh khi ttang tuk hlah u sih. Krifabu zonghi khuai lengmang hlah u sih.

Biafunnak: Hi a si caah hin dawtmi laihri tlai Laimi u le nau hna kan ning hi thlen a hau cang. Cucaah "dothlen" kan hauh cang. Do thlen tikah a hmaisabik ah kan lungputchia pohpoh hi thleng hmaisa hna u sih. PT nih thluachuah in pe ko hna seh.